AF268: 86v

41 Bu söze bu ḥadĭs̱ çün oldı delīl
Oqu maʿn[ā]sın eyle ḫalqa sebīl

ḫayru n‑nāsi man yanfaʿu n‑nāsa wa šarru n‑nāsi man yuḍirru n‑nāsa

42 Baḥr‑i ḥikmetde çün olub ġavvāṣ
Bulmışam dürr‑i şāh‑i gevher‑i ḫāṣ

43 İki dürlü buyurdı ʿilmi ḥabīb
Biri dīn ʿilmi biri ʿilm‑i ṭabīb

44 Bu sözüñ hem delīl‑i rūşeni var
Bu gülüñ s̱ābit oldı gülşeni var

al‑ʿilmu ʿilmāni ʿilmu l‑abdāni ṯumma ʿilmu l‑adyāni ṣadaqa ḥabību llāhi

45 Çün beden ʿilmin evvel añdı resūl
Aṣlı vardur bu sözüñ eyle qabūl

46 Ṣaġ olmasa kişi dīn ʿilmi
Nice taḥṣīl ėder hemīn ʿilmi

47 Bu sebebden dėdi ḥabību llāh
Derde dermān olan ṭabību llāh

48 ʿUlemā meclisinden olma ıraq
Rāġıb ol dīne eyle aña yaraq

49 Ḥükemā sözlerin işit dāyim
Bedenüñ dāyimā ola qāyim

50 Bu sözüñ şāhidi ḥadīs̱‑i ṣaḥīḥ
Ki buyurdı bunı belīġ ü faṣīḥ

ʿalaykum bi[!]‑muǧālasati l‑ʿulamāʾi wa‑stimāʿi kalāmi l‑ḥukamāʾi li‑anna llāha taʿālā // yuḥyī l‑qalba l‑mayyita bi‑nūri l‑ʿilmi wa‑l‑faṣāḥati ka‑mā yuḥyī l‑arḍa l‑mayyita bi‑māʾi l‑maṭari

51 ʿUlemā meclisin qoma elden
Ḥükemā sözlerin işit dilden

52 Tā ki qalbüñ dirile bula ḥayāt
Dirilür nite kim ṣu birle nebāt

53 Çünki böyle işāret olmışdur
Ümmetine beşāret olmışdur

54 Farẓdur ehl‑i ʿilme bildüre dīn
Bile ṣavm u ṣalātı ehl‑i yaqīn

55 Ḥükemā üzre farż olan cānā
ʿİlm‑i ebdān[ı] ėtmedür ifşā

56 Bildügüm deñlü bu faqīr ü ḥaqīr
Şemsden ẕerre eyleyem taḥrīr

57 Baḥr‑i ḥikmetde niçe biñ Loqmān
ʿAcz ü noqṣān‑ile qalur ḥayrān

58 Niçe yüz biñ ḥekīm ü Eflāṭūn
ʿĀleme her ki geldi ehl‑i fünūn

59 Şemsden ẕerre deñlü bilmediler
Baḥrden qaṭre deñlü almadılar